Artikel deur Janice Keogh wat in Beeld verskyn het.
’n Seun van Soweto wat ongeveer ’n maand lank in Kaapstad was om brandletsels aan die regterkant van sy gesig te laat opereer, kan nie wag om sy nuwe gesig vir sy ma en tante te wys nie.
Net soos Pippie Kruger (3) het Franklin Mochadibane ook met vuuraansteekjel gebrand.
Franklin (nou 19) was 12 toe hy een oggend voor skool ’n bottel van dié jel oopgemaak en dit oor die regterkant van sy gesig, sy regteroor en regterarm en borskas ontplof het.
Franklin sê in die deel van Soweto waar hy grootgeword het, het almal vuuraansteekjel as goedkoop alternatief vir paraffien gebruik.
“Ons moet meer mense vertel van die jel. Ons vertel hulle nie genoeg van die gevare daarvan nie,” het hy gesê.
Prof. Don Hudson en dr. Shaun Moodley het oor ’n tydperk van drie weke in die Grootte Schuur-hospitaal die opgehewe letsels aan Franklin se gesig verwyder, Pentac (tydelike vel) op die wond gesit en later ’n dun lagie vel bo-op sy kop gevat en dit oor die wond gesit.
Sy hare het teruggegroei en geen letsel kan bo-op sy kop gesien word nie.
Die merke aan sy gesig is nog baie rou, maar reeds aansienlik minder opgehewe as voor die operasie.
Hy sê dit behoort later net soos die gladde brandmerke aan sy regterarm te lyk.
Franklin sê dit was voor die operasie baie sleg om in ’n winkelsentrum te stap en te sien hoe mense staar en agter hul hande fluister. Hy is baie gelukkig oor hoe sy gesig nou lyk.
By Beeld se besoek aan die Children of Fire-huis in Auckland Park, Johannesburg, het Franklin wetenskap sit en leer vir sy gr. 11-eksamen.
Hy het weens sy beserings en die gevolglike lewensomstandighede agtergeraak met sy studie en is nou ’n leerling aan die Jabulani Technical School in Soweto.
Ná skool sal hy graag wil studeer om ’n lugvaartingenieur te word.
http://www.beeld.com/Suid-Afrika/Nuus/Eks-nou-gelukkig-20121121
